ليه الريس بيشرب سبرايت...بقلم هشام عفيفي
بسم الله الرحمن الرحيم


وانت قاعد في البلكونه كده الساعه اتناشر بليل ...بتشرب نيسكافيه بمعلقتين سكر


وبتسمع نجوم اف ام ...


تقوم سائل نفسك ...هو ينفع حد غير الريس يمسك مصر ؟؟؟؟؟


ممكن تكون متحمس ..وتقول...اه وليه لا يعني...التغيير ممكن ديما !!


ممكن تكون سلبي وتقول ...حد غيره ازاي ...هو مات لا سمح الله ؟


ممكن تكون منطبع عندك الفكره بتاعت تسعه وتسعين في الميه من شعب مصر : الي نعرفه احسن من الي منعرفوش


وكأن - حاشا لله - الريس بيبيع اجهزه الكترونيه ..وبيستوردها من كوريا..وانت ضامنه وبتتعامل معاه من زمان


------------------------------------------


ولكن هناك رد كويس..بيتكون من - العقلاني واللا عقلاني - ...ايه الكلام الكبير ده ؟؟


هبسطهالك : عندنا في المجتمعات العربيه...في حاجه في منتهي السخف والحماقه


وهيا ..الانعره الكذابه ....ديما موجوده ...لو واحد رئيس هيئه كناسين الشوارع...يروح يفرض تناكته ..علي جميع الي بيكنسوا الشارع.....مع انه هو زات نفسه يعتبر كناس !!!!!


ولكن هو عنده .....انا رئيس هيئه الكناسين !!!!!!!!!!!!!!!


كذالك المجتمع العربي في الحكم والرئاسه


عندنا في المجتمع العربي....مش هتعرف تتقبل رئيس بعد انتهاء فتره حكمه


يا اما هيطلع عينه ..حتي لو كان رئيس كويس هيطلع عينه برده


يا اما يسافر علي حته غير البلد الي هوا فيها




وبعدين اي رئيس يقولك : بقي انا كنت رئيس دولتك يله ....تيجي دلوقتي تروح تقولي اسكن في شقه


حتي لو مقالكش بس في قراره نفسه كده ...


اي رئيس عربي ...عنده الانعره الكدابه......ازاي انا اكون رئيسك وحاكمك ..وفي الاخر حد غيري يمسك


ويتحقق معايا في قضايا....ده محدش كان يستجري مش عارف ايه راح فين !!!






-------------------------------------


سياسه تقبل الرئيس بعد انتهاء فتره حكمه ...غير موجوده في العالم العربي...


علي عكس العالم الغربي...


اديك مثال : جورج بوش ...والي قبله والي قبله...الراجل قعد تمن سنين - وهي اقصي مده لرئاسه شخص ما في امريكا -


وبعد كده وبعد ما خلص ..انتقل لحي راقي شويه ..الراجل عايش حياته عادي جدا..والست لورا بوش بتبيع كروت


شحن والناس شغالين زي الفل ..ولا حد بيقوله انت وحش ..ولا حد بيقوله انت حلو




اربع رؤساء اتقابلوا مع اوباما .....وهات رئيسين عربيين لنفس الدوله اتقابلوا مع بعض




عشان طبعا الريس مينفعش يطلع من الرئاسه ....وبيعمل ديما الي في دماغه..لانه بيشرب سبرايت ..وبيقول : انا الريس...انا سبرايت




بقلم هشام عفيفي


المره الجايه هنقول يعني ايه كوك زيرو

له حق يستهفأكم ..لانكم شعب متخلف....بقلم هشام عفيفي Share
بسم الله الرحمن الرحيم


لن أأسف لمن اتهمه بالتخلف والغباوه....لان الموضوع اخد اكتر من مكانه

دلوقتي الراجل الاهبل المتخلف الملحد ....عمل صفحه علي الفيس بوك مدعي الالوهيه.......الصفحه كانت مجمعه سبعتاشر ملحد راخر..غالبا صحاب الراجل الملحد الاولاني

يقوم الشعب العربي الفكيك ...الي عامل نفسه بيدافع عن الله ورسوله ...وعامل فيها ناصر لدينه ...ولكن هو في

اكثر صور التخلف غباوه ......يخش يشتم ...ويخش يهزء....ويعرض الصفحه علي الناس ...عشان يخشوا يشتموا

ويعملوا ريبورت ....ويقوم طبعا عم الفكيك ..فاتح جروب......معا لنغلق صفحه الرجل المدعي الالوهيه

عايزين نجمع سبعتلاف غساله وتلاجه واربعين شخص لكي نغلق الصفحه التي باسم ...( مش هذكر اسمها عشان
مكونش بعمل زيهم )


وهدفه من الحكايه ....مش انه يقفله وولا حاجه .....هو عايز يشبع دافع وحب الامتلاك ....انه عنده جروب فيه كزا كزا كزا

وانه كده ارضي نفسه خلاص ..وانه كده بيدافع عن الله ورسوله .....وهو ساهم في نشر الصفحه المنيله بنيله

قمه في التخلف..الراجل كان سبعتاشر.....اخر مره شيكت عليه ..( مع العلم اني مش فان في الصفحه )

لقيته خمستاشر الف .....صباح التخلف...والناس داخله تشتم ..وتعمل فان وتدعو اصحابها ويلا نشتم



والراجل التاني..الملحد ده ..الي مدعي الالوهيه .....توصل الصفحه لمئه الف ولا حاجه ...

وبعدين بقي يقعد يبيع ملايات . ويسوق موبايلات مستعمله .....ويعلن عن كورسات التنميه البشريه

:S:S:S صباح التخلف الاقليمي

يقوم جاي شخص ..سالني : وازاي نسيبه بيسيئ للذات الإلهيه ..ونسكت

هقوم قايله حاجه : لو لقيت واحد في الشارع ..عمال يشتم في ربنا ...لوحده ..ووقف اتنين تلاته يسمعوه

تقوم انت جايبه علي قناه الحياه ولا روتانا سينما ...وتقولوا الحقوا يا جماعه الراجل بيشتم ربنا ؟؟؟؟؟؟

يبقي انت في قمه التخلف والجهل .....وللراجل حق انه يستهفأك ويعرف يتشهر علي حسابك

لانك ببساطه متخلف :S:S:S

امال الحل ايه : 1 - الي عامل جروب او اي حاجه عن الصفحه تتقفل تتفتح ...يلغيها او يغير الاسم

2 - الي عامل فان للبيدج يخرج منها ...وترجع لعدد حقير وميسمعش ..لان لو سمعله هتتحرق انت زياد

ومش هتستفيد حاجه

3 - لو عديت علي البيدج ...اعملها ريبورت من غير ما تعمل فان ومن غير ما تشتم ومن غير ما تنشرها علي الناس

4 - بطل العيشه والنفخه الكدابه ..انك بتدافع عن الله ورسوله علي النت .....لو عايز تدافع عنه ..تدافع عنه انك ترفع من مكانك في الاسلام ..عن طريق اتباع سنه الله ورسوله ..

مش تعملي جروب :S:S

بقلم شخص بيستخدم عقله في التفكير : هشام عفيفي

محلوظه : لو عجبك الكلام ..يا ريت تخلي غيرك يستفيد بيه ...علي اوسع نطاق..لان الموضوع اخد اكتر من حقه بكتير :S
حاجه تفقع المرارة يا ريس ......بقلم هشام عفيفي
بسم الله الرحمن الرحيم

اذا جاء رواد الطب المتقدم الي الشعب المصري...فسيكتشف ان للبني ادم اكثر من مراره واحده

وسيلغي تماما فكرته ..عن استئصال حويصله المراره....لان الشعب المصري..يعتبر كل يوم بتتفقع مرارته

.....لعل دارس الطب سيترك الطب ..ويدرس علم الاجتماع ..لكي يعرف..الشعب ده بتتفقع مرارته كتير كده ليه ؟

وينزل اخذا اراء الشعب ..قائلا لاحدي المواطنين : تحب تفسر للرئيس ليه بتتفقع مرارتك كل يوم ؟

يرد المواطن المسكين البسيط قائلا : يا ريت تسمعني يا ريس..

انت جاتلك المراره زي ما بتجيلي كل يوم يا ريس....

- لما نسمع ان مرات وزير الصحه هتتعالج بتنين مليون جنيه علي نفقه الدوله...وعم عز السواق مش عارف يغسل الغسيل الكلوي كل يوم ..بتتفقع مرارتي يا ريس

- لما اسمع ان وزير الماليه .عالج عينه بمليون دولار علي نفقه الدوله...وعم صلاح مش عارف يعمل نضاره ..بتتفقع مرارتي يا ريس

- لما انت تسافر بره تشيل مرارتك علي نفقه الدوله يا ريس..بتتفقع مرارتي...

- لما يتصرف علي المؤتمرات واللقائات والمحاضرات في شرم الشيخ ملايين ..و غيري مش لاقي اوضه ينام فيها مرارتي بتتفقع يا ريس

- لما افتكر كل مره مرارتي بتتفقع ليه.....مرارتي بتتفقع يا ريس..

ثم يخاطب سائله - الذي ترك الطب ودرس علم الاجتماع - قائلا : كفايه لحسن مرارتي اتفقعت

يرد عليه السائل : وحياتك مرارتي انا الي اتفقعت

من مفقوع المرارة : هشام عفيفي
وما الدنيا الا نت صغير

بسم الله الرحمن الرحيم

كل ما سأقوله واقع وحقيقي ميه بالميه..ولكنه غير موثق بالشهر العقاري

حصلتلي حاجات كتير اوي علي النت ...بتثبت ان الدنيا صغيره جدا

صغيره فحت السنين علي الانترنت

والي هقولهولكم ..جايز تتفكروه خيال

مثال 1 : كنت بلعب لعبه اونلاين ..في سرفر واحد من اوروبا...وكان بيلعب في السرفر واحد من مصر بردو .....فاتعرفت عليه
طلع ساكن في الحي الي انا ساكن فيه ..وطلع هو صاحب اخو واحد صحبي
.......
شايف الدنيا ضيقه ازاي علي النت

خد عندك المثال التاني 2 :

اعجبت بواحده علي الفيس بوك ...طلعت اختها كانت صاحبت بنت خالتي في المدرسه

واختها في نفس الوقت ..دخلت نفس الكليه مع واحد صاحبي تاني
ونفس القسم وطلعوا عارفين بعض
...........
ضيقه ضيقه يعني

المثال الثالث 3 : كنت انا في الامارات ..اتولدت وترعرعت هناك
( حلوه ترعرعت دي ) وكانت اولي صداقاتي هناك
واضطرتنا الظروف اننا نرجع لمصر البلد الام

وبعديها بعشره اعوام ( عدد حقيقي )
دورت علي صاحبي الي كان معايا في الفصل علي الفيس بوك
ولقيته
مع العلم ان : انا مصري وكنت عايش في الامارات ..وهو سوري وكان عايش في الامارات ..وكل منا رجع بلاده

وبعديها بعشر سنين لقيته علي الفيس بوك

كمان دورت علي صحاب اخواني الاتنين.
الي هما كانوا سودانيين عايشين في الامارات..واحنا مصريين عايشين في الامارات
وكل واحد ساب التاني
وبعديها بردوا بعشره اعوام لقيناهم

لك ان تتخيل ان الدنيا اصبحت صغيره جدا

ولكن الفكره الرئيسيه فين :

الفكره الرئيسيه ...ان الانترنت هو حل لمشكله كانت مدايقه الي اخرتعه

انه مش عارف ينقل البيانات من هنا لهنا ...

نص بياني مش عارف ينقله جهاز لجهاز

حط كل تركيزه...انه ازاي ينقل بيانات من هنا لهنا

وكان به اختراع الانترنت وافاد العالم كله بيه....شايف الي عايز حاجه بيعملها ازاي ؟

الفيس بوك : مارك زاكربورج ..مكانش عارف يتواصل مع افراد الجامعه بتاعته

علي شبكه واحده..كل ما يتصل مع التاني..يفقدوا التالت في شبكه تالته

بمعني مختصر : مش عارف يجمعهم

فراح مطلع الفيس بوك ...عشان يتواصل مع اشخاص جامعته

وعمم الفكره ...واصبح الفيس بيجمع افراد كتير

منهم صاحبي السوري الي كان عايش معايا في الامارات وانا المصري الي رجعت مصر وهو رجع سوريا ..وعرفت الاقيه تاني بعد عشره سنين

النصيحه الاخيره : ركز كل تفكيرك في حل مشكلتك ..جايز تفيد العالم باسره

في حل مشكله من مشكلاتك

بقلم : هشام عفيفي


الفالنتاين ...من غير لت وعجن......بقلم هشام عفيفي
ملحوظه : دي وجهات نظر :) قد تصيب وقد تخطا


بسم الله الرحمن الرحيم


الفالنتاين


وجهه النظر الاقتصاديه : هو يوم تباع في اي حاجه حمره ..وتحقق نسبه عاليه من الارباح في الكافيهات !


وجهه النظر السياسيه : يوم ينشغل فيه النسبه الغالبه من الشباب - اساس المجتمع -


وجهه النظر الدينيه : فسق وبدعه وضلال ...


وجهه نظر تربويه : قسم اول : لا ميصحش وعيب يا ولد ويا بنت
------------------ قسم تاني :(في المجتمع الحالي ) فرصه الاولاد يعيشوا وينطلقوا والحريه وكده :)


وجهه نظري انا : هو يوم .....يعتبر الناس بيتلككوا فيه عشان يحبوا بعض ....نظرا لان بقيت الايام غالبيتها نكد


وانشغال....فيعتبر الواحد بياخد اجازه .من الهم شويه .....انصح الزوجين بالاستفاده من هذا اليوم كفرصه


وانصح بالاستفاده من وجهه النظر الاقتصاديه لهذا اليوم


ولا يمكنني ان اقول للشباب الغير متزوجين ..متحبوش بعض..نظرا لان موضوع الحب اصبح متراسخ في المجتمع


ولكن يمكنني القول.......حبوا ..ولاكن بعقلانيه


هشام عفيفي

لت وعجن.....بقلم هشام عفيفي
ملحوظه : قد اصيب وقد اخطأ


بسم الله الرحمن الرحيم


احد اسباب ان الي بيقري المقاله.....مش عايز يقراها عشان كتر اللت والعجن الي اداله انطباع عن اي حاجه مكتوبه


............................


خد عندك : نص الشباب مبتقراش كتب ..ليه ؟؟ عشان بيقولك يا عمي دي مليانه لت وعجن عالفاضي


سؤال طب فين متعه الكتاب..ومعرض الكتاب...وغلاف الكتاب...واي حاجه اخرها الكتاب ؟


جواب يا عم صلي علي النبي ...هو انا فاضي اقرا ميه صفحه - اقل عدد -


لو حسبتها بالورقه والقلم : هتلاقي انه فاضي جدا يقرا عشر الاف كتاب ..- رقم حقيقي وليس مجازي -


سؤال تاني : امال حصل ايه ؟؟؟؟ ليه الناس مبتقراش ......ليه نسبه القرايه في الحضيض زي ما بيقولوا


_____________________________________________________________________________




الجواب من وجهه نظري انا - هشام عفيفي - وقد اصيب وقد اخطأ




- (لاتعلموا ابنائكم على عاداتكم فانهم مخلوقون لزمان غير زمانكم) (علي بن ابي طالب)


جمله من اخطر الجمل الي احنا مستهترين - النسبه الغالبه من المجتمع - فيها جميع مفاتيح تفسير سبب فشلنا




فالاهالي صاحبة المقوله الشهيره : مفيش احسن من تعليم زمان


: العصايه دي ياما طلعت اجيال


وغيرها من المقولات المعروفه


هتقولي ايه علاقته برده باللت والعجن ...هشرحلك انا بقي


دلوقتي الطفل في المجتمع بيكتسب ثقافته من البيت والمدرسه ..اكثر اتنين مؤثرين فيه




زمان سنه ستين ..كان بيتقال لاحمد زويل : اكتب ما تعرف عن..........


يقوم كاتب زويل ...ان كزا .....عباره عن كزا ..... وان كزا .....


وهاتلك تلت صفحات بدون ما يسيب سطر ..وكده ياخد العلامه الممتاز


وكذالك هو هو التعليم القائم حاليا.....


يجي الشخص المسكين الضعيف الغلبان من اولي ابتدائي :


احمد يزرع شجره ....احمد يزرع شجره .....احمد يزرع شجره .....احمد يزرع شجره


احفظ يابني : احمد يزرع شجره ......احمد يزرع شجره .....احمد يزرع شجره


يعدي الطفل مرحله الابتدائيه


ويخش في الاعداديه : الليل والخيل والبيداء تعرفي ....الليل والخيل والبيداء تعرفني ....الليل والخيل والبيداء تعرفني


يخلص من الاعداديه يخش الثانويه : مكرم مفرم مقبل مدبر .......مكرم مفرم مقبل مدبر ........مكرم مفرم مقبل مدبر


ديما طول حياتي المدرسيه ...بسال نفسي ...هو انا بستفيد ايه ؟؟؟ ايه الي انا اسفتدتو لما عرفت ان احمد بيزرع شجره


ايه الي انا استدفته لما عم المتنبي متصاحب علي الليل والخيل والبيداء والاخت تعرفني ؟؟؟؟


طبعا مع ضغط الاهالي .والمدارس ..والمدرس ...ومستقبلك ...والدراسه


ومستقبل والثانويه والجامعه والاعداديه


بطلع من الامتحان ..بقول ...اليل والخيل تزرع احمد .........!!!!!!


يبقي انت بتكون القيم والمعتقدات عن القرايه والمواضيع ...ان دي شيء غبي ....وعباره عن لت وعجن


---- سؤال وجيه : امال ليه الناس بتاع زمان كان بينفع فيهم التعليم ده


---- جواب وجيه : زمان كانت ظروف الحياه والعصر الي بتعيش فيه ..بيسمح لعقلك انه يستوعب الكلام ده علي
اساس انه مفيد


وجيه زات نفسه : انما في العصر الحالي ....انا كل يوم بقعد علي الكمبيوتر ..وبستخدم الموبايل...وبركب العربيه


وبملي بنزين مستخرج من باطن الارض......استفدت ايه انا من الليل والخيل والبيداء ؟


وحيد اخو وجيه : لا يا عم ده الشعر والثقافه والحاجات


سالم اخوهم الكبير : التعليم في المدارس مبيعلمكش ان ده شعر بيرقي المعاني ويرتقي بالالفاظ


التعليم في العالم العربي بيعرفك ان الجملتين دول ..جايين في الامتحان يعني لازم


تحفظهم


__________________________________________________________________________________


لما يكون كل طالب في العالم العربي عنده امتحان ..اكتب تعبير من عشر صفحات عن البطيخ العربي


فايده الدش ده كله ....انك بتكون عند الشخص ازاي يتلاعب بالفاظ ..عشان يعرف يحشي الورقه ...عشان يقفل


العشر صفحات


.............


ويتسائل الجميع ليه محدش بيقرا....وليه الكتب الاقبال عليه مفيش


لما يكون الشخص طالع من مدرسته ...قرفان من اي شيء بيقراه ...واتقرف من شيء اسمه تعليم


استحاله ان ترتقي الامه العربيه
.
.............


ويتحسر العرب علي علمائهم ...حينما لا ينتجون في بلادهم


الرد علي الهذا التحسر : مثال مشروع زويل ...الذي وضعت خطته وكل شيء..وقوبل بالرفض


وقول المسؤولين : ضمن خطتنا ان شاء الله ..واحنا بنسعي لهذا


ولما زويل حط حجر الاساس....بعديها شالو الحجر


يبقي محدش يتحسر علي القرايه تاني


عشان كله بقي لت في عجن


واحتمال كبير يبقي الي انا كاتبه ده


لت وعجن


هشام عفيفي

تحداني يهودي دينماركي امريكي افغنستاني ..انه ميعملش حاجه ...بقلم هشام عفيفي
محلوظه : هتلاقوا كتير من الي هقولو منتشر في الفيس ولو سمحتوا اعملولها شير ..مش عشاني انا عشان ..الناس العقيمه الي بتعمل الصفحات والجروبات دي


----------------------------------------------------------------


بسم الله الرحمن الرحيم




كل ما اخش علي بروفايلي علي الفيس بوك ...اقول هو الناس دي مبتفكرش خالص ؟؟؟؟؟


واحد يقولي مبتفكرش في ايه ؟




اقولوا في الجروبات والصفحات التافهه الي معموله


مثال واحد فقيع : لو جمعنا 750000 هتعتزر الدينمارك عن اسائات الرسول


تعالوا نحلل البيدج : دلوقتي خلاص ...كل الدينمارك بشعبها ..وبكل حاجه ..وبحكومتها ..مستنيه البيدج


وقاعده مترقباه ..بيقوله يا رب متوصلش للعدد ده لحسن كده هنعتزر ؟؟؟؟


يعني مثلا هيحصل قرار لرئيس الوزراء ..يجي المساعد بتاعه ..يقول : يا فندم البيدج علي الفيس وصلت 750000


لازم نعتزر يا فندم .....يرد عليه رئيس الوزراء : طيب اعمل مظاهره وخلي الشعب يعتزر فورا ؟؟؟؟


ايه قمه التخلف ده ......لازم تعرف ان هدف الي عامل البيدج انه ينتشر وخلاص .....مش عايز حاجه تانيه


فكر شويه لما تشوف اعلان البيدج


______________________________________________________________


مثال اتنين افقع : لو جمعنا مليون وشويه ...الفيفا هتلغي ماتش الجزائر ...وتخلي المنتخب يصعد


خلاص بردو ......الفيفا ورئيس الفيفا وكل العاملين بيها ..قاعدين مستنيين صفحه الفيس .....لما تكمل




ويصدر قرار : قررنا نحن مديروا الفيفا الغاء متش الجزائر ..واعطاء المنتخب المصري ا لتأهل لكاس العالم


نظرا للصفحه الي علي الفيس ......................بالزمه ده كلام




الناس الي بتشترك في البيدجات دي ....مبتشغلش عقلها ولو لوهله ؟


_____________________________________________________


مثال تلاته والاشهر عالميا : تحداني يهودي ..تحداني امريكي ...تحداني سوداني....تحداني افغانستاني..


تحداني بروكينو فاسسي ...تحداني كولالامبوري






خلاص الراجل رايح لكل السفارات . الي في دولته ..ويخش للسفير ..يقوله والنبي هاتي واحد يتحداني عشان


اعمل بيدج علي الفيس بوك........


تحداني يهودي ان اجمع مليون مسلم .......طب وبعدين ؟؟؟؟؟ حصلك ايه انت بقي .....هتجمعهم تعمل بيهم ايه ؟؟؟؟؟


اي فتي وخلاص ........اي حد عايز ينتشر يعملك بيدج ...ويقولك تحداني - اي جنسيه - ان اجمع - اي عدد -


وكل خمس دقايق يشوف البيدج وصلت كام ......


يا لها من تفافهه وهرائات




_________________________________________________________________


المثال السياسي : هنجمع سبعين مليون عشان نلغي الجدار العازل




الجدار العازل ده فيه حاجات دوليه وسياسات اطلقت ..وحكومات واتفقايات ...واسمنت وحديد ومسلح




تفتكر كل ده هيقولو لالا يا جماعه الناس علي الفيس بوك قالوا منمبنيش..خلاص منبنيش ...شيل يابني الاسمنت من هنا


؟؟؟؟؟؟


مثال تاني : عايزين نجمع سبعه مليار ..عشان نطير الرئيس مش عارف مين من الحكم


خلاص ....الرئيس قاعد علي الفيس ..بيشوف البيدج ..ولما تكمل ..يقول لرئيس الوزراء


لالا خلاص انا همشي لحسن اتعملي صفحه علي الفيس بوك :S:S:S


_________________________________________


محلوظه هامه : محدش يقولي احنا بنعمل الي علينا ....وبنعبر عن الي جوانا ......والبتنجان الابيض ده


لو عايز تعبر عن الي جواك وتعمل الي عليك .....أعمل حاجه تحدث تغيير ايجابي ...مش تقعد تجمعلي في ناس


وخلاص ......السلبيه دي هيا اهم اسباب تخلف المجتمع العربي .......


وانا واثق ان تلت تربع الردود الي هتيجي عليا تقولي : هو انت مش عايزنا نعبر ..عملت ايه انت ...احنا بنطلع الي جوانا


______


يا رب اعني عليهم
______


هشام عفيفي